Сааскы каникул-оҕо аймахха кэтэһиилээх кэм. Чэбдик салгыҥҥа ким хайыһардаан, ким хаҥкылаан таһырдьаттан киирбэккэ, эти-сиини эрчийэр. Ону тэҥэ араас таһымнаах спортивнай күрэхтэһиилэр, турнирдар, олимпиадалар ааҕан сиппэт тэрээһиннэр оҕону сайыннарар сыаллаах-соруктаах ыытыллаллар.

 Ырыа-хоһоон аргыстаах оҕолор, Саха сирин араас улуустарыттан Дьокуускай куоракка тоҕуоруһа түмсэллэр.

     Быйыл үгэс курдук Н.А.Атласов аатынан Эдьээн орто оскуолатын уолаттара кулун тутар 25 күнүгэр Саха сиригэр ыччат хамсааһынын төрүттэммитэ 95-сылыгар аналлаах «Эдэр ыччат бэлэммит, Ийэ дойду иннигэр» диэн дьүһүйүүнэн сэттэ уол ситиһиилээхтик кыттан кэллибит. Урукку сылларга холоотоххо быйыл арыый аҕыйахтар ол эрээри сүүстэн тахса оҕо аахпыт. Урут икки сүүстэн тахсар этилэр. Саха сирин суруйааччыта Н.Н.Винокуров-Урсун сыллата ааҕыы таһыма үрдээн иһэрин, уол оҕо ааҕыы абылаҥар ылларан, ийэ тылын имитэрин-хомутарын маннык күрэхтэһиигэ сайдарын, саҥара, тута-хапта үөрэнэрэ олус туһалааҕын, бу бырайыагы сэҥээрэрин эттэ.

Уолаттар бары суруйааччы да буолбаталлар, улуу поэттар хоһооннорун ааҕаллара ис иэйиилэрин уһугуннарара саарбаҕа суох. Оскуоланы бүтэрэн студенныы сылдьар уолаттарбыт салгыы уран ааҕыынан дьарыктаналларын истэн үөрэбит. Ол аата бу бырайыак оҕо сайдыытыгар туһалаах эбит.

     Конкурс туһунан аҕыннахха, быйыл биһиги бөлөхпүтүгэр түөрт саҥа уол киирдэ. Саҥа киирбит оҕолор догуйаллара ханна барыай, ол да буоллар 1степэннээх дипломант, «сонун дьүһүйүү» бэлиэнэн, Трофимов Андрей I (11 кылаас) «Хомоҕой ааҕааччы» мэтээлинэн уонна «Кэскил» лааҕырга путевканан наҕараадаланан үөрүүбүт улахан.

     Итини таһынан быйыл саха норуодунай суруйааччыта Д.К.Сивцев-Суорун Омоллоон 110 сылыгар аналлаах «Сырдык суолунан сыдьаайан» диэн ааттаах 1-11 кыл. биирдиилээн уонна бөлөҕүнэн уран  ааҕааччылар конкурстара  Е.Ярославскай  аатынан музейга  кулун тутар 23, 24 буолан ааста.

     Биһиги оскуолаттан 5 кыл. үөрэнээччитэ С.Омоллоон «Ынахтаах ат муҥатыһыылара» айымньытын Костя Скрыбыкин 70-тан тахса үөрэнээччилэр ортолоругар ааҕан, Саха театрын аатыттан «Кэскиллээх ааҕааччы» диэн бирииһи тутан үөрдэ-көттө.

     Дьэ, ити курдук музейдарынан, оҕо сайдыытын дыбарыаһынан көхтөөх конкурстарга кыттан, куорат устун күүлэйдээн, саҥа чэбдик күүһүнэн бүтэһик чиэппэрдэрин ситиһиилээхтик түмүктүөхтэрэ.

    Маннык үөрүүнү, дуоһуйууну бэлэхтээбит күндү төрөппүттэрбитигэр, чуолаан Хартасовтар дьиэ кэргэттэригэр, сыллата биһигини эрэйэ суох бачча ыраах таһар оскуолабыт суоппарыгар В.Л.Атласовка уонна биллэн турар, көҥүллээн ыыппыт оскуолабыт салайааччыларыгар улахан махталбытын тиэрдэбит.

Салайааччы оскуола учуутала

 И.М.Винокурова